Azərbaycanla Gürcüstan arasında elektrik enerjisinin Türkiyəyə tranziti ilə bağlı hökumətlərarası saziş imzalanıb. Bu barədə “Report” Azərbaycanın İqtisadiyyat Nazirliyinə istinadən xəbər verir.
Sənəd Ümumdünya Şəhərsalma Forumunun 13-cü sessiyasında (WUF13) iştirak etmək üçün Bakıya gələn Gürcüstanın baş naziri İrakli Kobaxidzenin Azərbaycana səfəri zamanı imzalanıb.
İki ölkə iqtisadiyyat, enerji və əlaqələndirmə sahələrində ikitərəfli əməkdaşlığın dərinləşdirilməsinə yönəlmiş geniş tədbirlər paketi imzalamaqla strateji tərəfdaşlıqlarını bir daha təsdiqləyiblər.
İmzalanmış sənədlərə Gürcüstana təbii qaz tədarükü, Azərbaycan təbii qazının əlavə həcmlərinin beynəlxalq bazarlara ötürülməsi üzrə tranzit mexanizmlərinin davam etdirilməsi, Gürcüstana elektrik enerjisinin tədarükü və elektrik enerjisinin Gürcüstan ərazisindən Türkiyəyə tranziti haqqında hökumətlərarası sazişlər, həmçinin Bakı–Tbilisi–Qars dəmir yolu layihəsi çərçivəsində aparılmış modernləşdirmə işlərinin yekun qəbulu və tamamlanmasını təsdiq edən Əlaqələndirmə Şurasının Protokolu daxildir.
https://report.az/energetika/azerbaycan-gurcustan-erazisi-ile-turkiyeye-elektrik-enerjisi-oturecek