Azərbaycan Dövlət Neft Şirkəti (SOCAR) ilə “GL Group” şirkəti arasında “Kürsəngi”, “Qarabağlı”, “Buzovna-Maştağa”, “Qala” və “Zirə” neft və qaz yataqları üzrə bu il üçün nəzərdə tutulan əməliyyat və investisiya fəaliyyətləri ətraflı müzakirə olunub. Bu barədə “GL Group”a istinadən məlumat verilib.
Müzakirələr iki şirkətin rəhbərliyinin iştirakı ilə keçirilən Rəhbər Komitənin növbəti iclasında aparılıb. İclasda “Salyan Oil Ltd” Əməliyyat Şirkətinin idarə etdiyi “Kürsəngi” və “Qarabağlı” yataqları, habelə “Taghiyev Operating Company” MMC-nin idarə etdiyi “Buzovna-Maştağa”, “Qala” və “Zirə” yataqları üzrə 2025-ci il iş proqramı və büdcənin icra vəziyyəti, eləcə də 2026-cı il üçün təqdim edilmiş proqram və büdcə təhlil edilib.
“GL Group”un baş icraçı direktoru və Məşvərət Şurasının sədri Asif Zeynalov ilə SOCAR-ın vitse-prezidenti Babək Hüseynovun birgə rəhbərliyi ilə keçirilən iclasda saziş sahələrində görülən işlər də qiymətləndirilib.
İclas çərçivəsində iştirakçılar “Salyan Oil Ltd” tərəfindən idarə olunan “Qarabağlı” yatağındakı 6-cı sahəyə, “Kürsəngi” yatağında yeni istismara verilən neft quyusuna və hazırda qazma işləri aparılan quyuya baxış keçiriblər.
Görüş SOCAR və “GL Group” arasındakı strateji tərəfdaşlığın inkişafı, hasilat səmərəliliyinin yüksəldilməsi və birgə layihələrin davamlı tərəqqisi baxımından əhəmiyyətli addım kimi dəyərləndirilir.
Xatırladaq ki, “GL Group” Azərbaycanda Salyan rayonunda “Kürsəngi” və “Qarabağlı”, Abşeron yarımadasında isə “Buzovna-Maştağa”, “Qala” və “Zirə” olmaqla beş neft-qaz yatağında əməliyyatlar aparır. Qrupun strukturuna “Salyan Oil Limited”, “Taghiyev Operating Company” əməliyyat şirkətləri və neft-qaz sektorunda texniki xidmətlər təklif edən “GL Technical Services” daxildir.
“GL Group” 2024-cü ildə beynəlxalq fəaliyyətini genişləndirərək Türkiyənin Trakya hövzəsində perspektivli qaz yatağında 100% paya malik olan Kanadanın “Gazelle Energy Limited” şirkətinin 25% payını əldə edib.
“Kürsəngi” və “Qarabağlı” yataqları Kür çökəkliyində yerləşir və müvafiq olaraq 1962 və 1960-cı illərdən istismar olunur. Bu yataqların daxil olduğu blok üzrə reabilitasiya, kəşfiyyat, işlənmə və hasilatın pay bölgüsü haqqında saziş 1998-ci il dekabrın 15-də SOCAR, “Frontera Resources” və “Delta/Hess” Ltd. arasında imzalanıb, 1999-cu il aprelin 22-də qüvvəyə minib. Əməliyyat şirkəti kimi “Salyan Oil Ltd.” yaradılıb. 2002-ci ildən saziş payları Çin Milli Neft Korporasiyasının (CNODC) nəzarətinə keçib. Blokun sahəsi 450 km² təşkil edir, işlənmə dövründə isə ümumilikdə 808 quyu qazılıb – 494-ü “Kürsəngi”, 314-ü “Qarabağlı” yatağında yerləşir.
Bu müzakirələr Azərbaycanın quru yataqlarında hasilatın optimallaşdırılması və investisiya cəlbediciliyinin artırılması istiqamətində mühüm əhəmiyyət daşıyır.
https://report.az/energetika/azerbaycanda-bu-il-ucun-4-neft-yatagi-uzre-investisiya-imkanlari-muzakire-olunub