Energetika Nazirliyinin tabeliyində fəaliyyət göstərən Enerji Məsələlərini Tənzimləmə Agentliyində (EMTA) Dünya Bankının nümayəndə heyəti ilə görüş baş tutub. Bu barədə EMTA-ya istinadən məlumat verilib.
Görüşdə EMTA-nın İdarə Heyətinin sədri Samir Axundov və Dünya Bankının Azərbaycan üzrə ölkə meneceri Ştefani Ştalmaysterin rəhbərlik etdiyi nümayəndə heyəti iştirak edib. Tərəflər ölkədə qaz təchizatı sektorunda aparılan islahatlar, tarif mexanizmlərinin təkmilləşdirilməsi və bu sahədəki mövcud vəziyyət ətrafında ətraflı məsləhətləşmələr aparıblar.
Bundan əlavə, Azərbaycanda metan emissiyalarının azaldılması istiqamətində görülən işlərin davam etdirilməsi, qaz infrastrukturunun modernləşdirilməsi və bu prosesləri dəstəkləmək məqsədilə Dünya Bankı və digər beynəlxalq maliyyə institutlarından əlavə investisiyaların cəlb edilməsi imkanları da müzakirə olunub.
Görüşdə hər iki tərəf enerji sektorunda davamlı inkişaf və ekoloji dayanıqlılığın təmin edilməsi üçün əməkdaşlığın daha da genişləndirilməsinin vacibliyini vurğulayıblar. Bu cür məsləhətləşmələr Azərbaycanın enerji siyasətinin beynəlxalq standartlara uyğunlaşdırılması və sektorun daha səmərəli idarə edilməsi baxımından mühüm əhəmiyyət daşıyır.
https://report.az/energetika/azerbaycan-dunya-bank-ile-enerji-tarifleri-ile-bagli-meslehetlesmeler-aparib